Ambasadorja e Suedisë në Serbi, Anika Ben David, ka deklaruar të premten se për de-përshkallëzimin e situatës në terren, është me rëndësi vendimtare që barrikadat në veri të hiqen dhe që serbët e Kosovës të kthehen në institucionet e Kosovës.
“Ne mendojmë se është me rëndësi vendimtare që të qetësohet situata, që barrikadat të hiqen dhe që serbët e Kosovës të kthehen në vendet e tyre të punës në institucione”, ka thënë Ben David për TV K1.
Ajo theksoi se lufta në Ukrainë do të përcaktojë presidencën e Suedisë me Bashkimin Evropian dhe se synimet e saj në gjashtë muajt e ardhshëm do të jenë një Evropë më e sigurt dhe më e lirë.
Barrikadat në veri janë vendosur nga serbët rreth dy javë më parë pas arrestimit të ish-policit të Kosovës, Dejan Pantiq, si të dyshuar për organizim sulmesh ndaj zyrtarëve të KQZ-së e Policisë së Kosovës.