Xhudistja jonë, Distria Krasniqi, ka arritur të fitojë medaljen e bronztë në kategorinë deri në 52 kilogramë në Grand Slamin që po zhvillohet në Abu Dhabi të Emirateve të Bashkuara Arabe.
Distria edhe një herë e ka bërë krenar shtetin e Kosovës dhe gjithë shqiptarët, duke rrëmbyer një tjetër medalje që vjen pikërisht në Ditën e Flamurit, 28 Nëntor.
Xhudistja nga Peja e mposhti kundërshtaren holandeze, Naomi Van Krevel, duke siguruar medaljen e bronztë përmes repesazhit.
Ndryshe, pejania i nisi shumë mirë garat gjatë ditës së sotme, duke triumfuar në xhiron e dytë ndaj ruses Katrina Efimova në kategorinë deri në 52 kilogramë, për të kaluar më pas në çerekfinale, ku mposhti me ‘waza-ari’ izraeliten Gefen Primo dhe u kualifikua në gjysmëfinale.
Megjithatë, në gjysmëfinale, kampionia olimpike ishte e pafat, pasi u ndal nga hungarezja Reka Pupp, të cilën e dominoi gjatë gjithë kohës së lojës së rregullt.
Distria u mposht në ‘golden score’, ku – pasi iu anulua një ‘waza-ari’ – gjyqtarët vendosën t’i jepnin një pikë kundërshtares së saj, e cila kaloi në finale.
Përveç Distrisë, Kosovën në këtë garë e përfaqësojnë edhe Laura Fazliu (-63 kg), e cila garon të shtunën, si dhe Shpati Zekaj (-100 kg), që garon të dielën./Sinjali