Ambasada britanike në Kosovë i ka dhuruar Policisë së Kosovës donacion në vlerë 153 mijë euro.
Donacioni përfshin dy automjete dhe 16 dronë me pajisje përcjellëse.
Pranim-dorëzimi i tyre është realizuar mes Emma Huntley, përfaqëesuese e Ambasadës, dhe Fehmi Xhatës, drejtorit të Departamentit të Policisë Kufitare.
“Ky donacion do të ndihmoj njësitet policore në raste të ndryshme, si në identifikimin, gjurmimin, monitorimin dhe përcaktimin e vendndodhjes së automjeteve dhe personave të dyshimtë.” – njofton Policia më 11.03.2026.
Policia vlerëson se pajisjet e specializuara do të luajnë rol shumë të rëndësishëm, do të ndihmojnë dhe profesionalizojnë edhe më tepër punën e tyre, në veçanti të njësiteve kufitare të cilat kujdesen për parandalim të krimit transkufitar, kontrabandës dhe migrimit të paligjshëm.
Me këtë rast, Policia e Kosovës e ka falënderuar Ambasadën britanike në Kosovë për përkrahjen dhe mbështetjen e vazhdueshme dhe u zotua se këtë do ta vërë në funksion të ruajtjes së rendit dhe sigurisë publike, patrullimit kufitar, si dhe shërbimit sa më efikas e cilësor ndaj qytetarëve dhe vendit.
Klikoni KËTU për tu bërë pjesë e kanalit të TV Prizreni në Youtube.
