Futbollisti i supertalentuar 17 vjeçar, Genti Shabani me prejardhje nga Opoja e Dragashit, qysh nga fëmijëria ka filluar te merret me sportin më të popullarizuar në planetë, duke qenë pjesë e klubit të mirënjohur të Danimarkës “EfB/Esbjerg”.
Ai së fundi ka qenë pjesë e grupmoshës U17 të këtij klubi danez, duke treguar shkathtësi dhe performanca të jashtëzakonshme në fushën e blertë.
Ditë më parë, gjatë turneut të mirënjohur të futbollit “ Nord Sea Cup” të shteteve skandinave, Genti ka tërhequr me paraqitje fascinuese vëmendjen e skautëve spanjollë, duke e përzgjedhur atë që bëhet pjesë e skuadrës së njohur nga shteti iberik “ Real Murcia”.
Genti ka pranuar ofertën e spanjollëve, dhe ai tashmë do të vijojë karrierën e tij në Murcia duke ndjekur njëkohësisht edhe shkollimin në “ International School Murcia”. Genti për Televizionin e Prizrenit thotë “ Shpresoj të kam sukses në të ardhmen me ndihmën e zotit dhe angazhimeve të mia”.
E ne shpresojmë se me formimin e tij të mëtejshëm si futbollist dhe falë paraqitjeve të suksesshme në fushën e gjelbër, ai të ketë karrierë kulminante dhe një ditë të vesh fanelën e përfaqësueses së Kosovës ose të kombëtares shqiptare.
