Në Aeroportin ndërkombëtar “Nënë Tereza” në Tiranë, mbërriti të dielën në mbrëmje një avion me qytetarë shqiptarë të cilët kanë kërkuar të largohen nga Izraeli pas shpalljes së gjendjes së luftës.
Mes 40 pasagjerëve, të ndihmuar nga autoritetet shqiptare, ishin dhe qytetarë nga Kosova apo Maqedonia e Veriut. Në aeroport ata u pritën nga ministri i Jashtëm Igli Hasani.
Ministria e Jashtme shqiptare njoftoi se “në ditët në vijim do të ketë sërish të tjera fluturime të posaçme drejt Tel Avivit, ndërkohë që jemi në koordinim edhe me ministritë simotra të vendeve të rajonit për t’u ardhur në ndihmë të gjithë qytetarëve që kërkojnë të kthehen në vendet e tyre”.
Gjatë së dielës, ambasadorja e Shqipërisë në Izrael, Meri Kumbe, ka thënë se është në kontakt edhe me shtetas kosovarë që aktualisht gjenden në Izrael, derisa atje s’kanë të ndaluar sulmet mes Hamasit dhe autoriteteve izraelite./voa