Sot është Dita Ndërkombëtare e Muzeve, ditë kjo e cila shënohet edhe në Kosovë. Ciceroni i
Samir Hoxha, drejtor i Qendrës Rajonale për Trashëgimi Kulturore në Prizren, i tha Radio Kosovës se numri i vizitorëve në Muzeun Arkeologjik të Prizrenit është në rritje, pasi është bërë edhe restaurimi i shumë artefakteve të cilat u janë prezantuar vizitorëve për herë të parë.
“Numri i vizitorëve në Muzeun Arkeologjik dita-ditës po shkon duke u rritur. Duke e ristrukturuar funksionimin e këtij institucioni muzeal, por edhe duke e bërë restaurimin e shumë artefakteve të cilat janë prezantuar për herë të parë para qytetarëve të Komunës së Prizrenit dhe turistëve. Po ashtu, numri i vizitorëve po shënon rritje të dukshme edhe në kompleksin e Lidhjes Shqiptare të Prizrenit. Dhe, pa dyshim, fluksi i vizitorëve po rritet çdo ditë e më shumë edhe në kalanë e Prizrenit”, deklaroi Hoxha.Ky i fundit shtoi se edhe Muzeu i Hidroelektranës është në proces të restaurimit dhe se shpejti do të jetë i gatshëm për vizitorë.
“Muzeu i Hidroelektranës është në proces të restaurimit. Dhe sa po të jetë gati kjo ndërtesë, do të jetë në funksion dhe në shërbim të komunitetit dhe vizitorëve dhe të jetë një qendër atraktive”, tha ai.