Disa prej minatorëve të cilët kanë hyrë në grevë nga e marta, 24 tetor, kanë kërkuar ndihmë mjekësore.
Minatorët janë futur në grevë pasi kërkojnë realizimin e pagave mujore nga qershori deri në tetor, shkarkimin e menaxhmentit, sigurimin shëndetësor dhe kushtet e punës.
Kryetari i Sindikatës së Trepçës, Ibrahim Januzi, ka thënë për KOHËN se numër i madh grevistësh kanë kërkuar ndihmë mjekësore.
“Po hyjmë në ditën e dytë të grevës, ku është një numër shumë i madh i minatorëve që kanë kërku ndihmë mjekësore. Numri i tyre është rreth 80 minatorë. Një numër prej tyre kanë kërku ndihmë në urgjencën e spitalit rajonal në Mitrovicë, ndërsa një pjesë tjetër kane kërku nga mjekët kujdestarë që janë duke kujdestaru, nga ata të nivelit të shëndetësisë lokale të Mitrovicës dhe mjekut kujdestar tonët”, ka thënë ai.
Januzi është shprehur se nuk e di se për sa kohë do të vazhdojë greva, megjithatë ka konfirmuar se pagesat kanë dalë, por kërkesat e tjera nuk janë përmbushur.
“Greva është duke vazhduar nuk dihet edhe për sa kohë. Pagesat kanë dalë, kërkesat janë edhe shkarkimi i kryeshefit, sigurimi shëndetësor dhe realizimi i pagës mujore me kohë”, ka deklaruar Januzi.