Kryeministri në detyrë, Albin Kurti dhe ministri në detyrë të Kulturës, Rinisë dhe Sportit, Harjulla Çeku, bashkë me kryetarin e Komunës së Suharekës, Bali Muharremaj, kanë vënë sot gurthemelin për ndërtimin e Stadiumit të Qytetit në Komunën e Suharekës, investim i Ministrisë së Kulturës, Rinisë dhe Sportit, në vlerën prej rreth 11 milionë euro.
Kurti e ka quajtur këtë lajm të jashtëzakonshëm për Suharekën dhe futbollin e sportin e Kosovës, duke shtuar se ky stadium është i kategorisë 2 + sipas UEFA-s dhe do të ketë më shumë se 6500 ulëse.
“Ky është investim i madh kapital, 11 milionë euro dhe tash presim që qytetarët e Suharekës, komuna këtu, ta përcjellin përditë, në mënyrë që punimet të shkojnë mbarë e sa më shpejt e në fund ndoshta të kryhen edhe para 750 ditëve, ndoshta edhe për më shpejt se dy vjet”, ka deklaruar Kurti, sipas njoftimit të ZKM’së.
Ndërkohë, Çeku tha se disa stadiume tashmë janë në realizim, disa përfundojnë shumë shpejtë, të tjerat nisin ndërkohë.
“Jam shumë i lumtur që Suharekës po ja nisim këtë investim shumë të rëndësishëm bashkë me fushën ndihmëse që tashmë është në përfundim e sipër. Pra këtu po zhvillohet një kompleks i rëndësishëm. Jam më së shumti i gëzuar për talentat, talentet e reja që veç e kanë pritur infrastrukturën, në mënyrë që potenciali i tyre me qenë maksimal. Po e shoh edhe sot prezencën dhe gëzimin e tyre. Është ditë feste për Suharekën, por edhe për Kosovën”, ka deklaruar Çeku.