Mësimdhënësit e shkollës dhe të gjimnazit “Loyola” kanë marrë pjesë në Programin Ndërkombëtar të Mësimdhënies si pjesë e bashkëpunimit me institucionet arsimore në Gjermani.Sipas njoftimit të gjimnazit “Loyola” ky aktivitet është realizuar në saje të partneritetit me dy universitete gjermane.
“Në kuadër të bashkëpunimit shumëvjeçar me Universitetin e Hildesheim-it dhe atë të Hannover-it, disa mësimdhënës të Loyola Gymnasium përkatësisht prof. Vezire Krasniqi, prof. Maksut Pirku, prof. Besnik Dakaj si dhe mësueset e Loyola-Fillore Bardha Ademaj dhe Hygerta Thaçi, morën pjesë në Programin Ndërkombëtar të Mësimdhënies”, thuhet në njoftim.
Gjatë qëndrimit në Gjermani, sipas njoftimit këta mësimdhënës janë njoftuar më afër me sistemin arsimor gjerman, kanë ndjekur zhvillimin e orëve në gjimnazin Andreanum dhe në shkollën Alter Markt, si dhe kanë pasur mundësinë që të kuptojnë më thellë mënyrën se si përgatiten mësimdhënësit në këto institucione.