Skuadra e Lirisë së Prizrenit, pas dy humbjeve dhe po aq barazimeve në startin e edicionit të ri në Viva Fresh Ligën e Parë të Kosovës në futboll, para 200 shikuesve në “ Përparim Thaçi”, ka shënuar fitoren e parë, duke mposhtur rivalen e vjetër KF “ Trepça” me rezultat 3:2.
Më i merituari për fitoren e prizrenasve ishte sulmuesi, Prince, i cili shënoi golin një gol, asistoi dhe ndaj tij u akordua penallti.
Të parët në epërsi kaluan mysafirët përmes qendërsulmuesit shtatlartë, Mustapha, në minutën e 25- të takimit, ndërsa prizrenasit barazuan përmës këmbëshpejtit, Prince, në minutën e 32- të të takimit, me të cilin rezultat skuadrat shkuan në pushim.
Në pjesën e dytë, vendasit kaluan në epërsi pas një penalltie të realizuar në minutën e 69-të takimit nga, Liridon Fetahaj, pasi gjyqtari akordoi dënimin më të rëndë pas një ndërhyrje në sulmuesin, Prince. Liria thelloi epërsinë në 3:1 në minutën e 78- të takimit përmes, Memajt, I cili u asistua për mrekulli nga Prince, pas një bashkëveprimi me, Albin Berishën.
Pork y nuk ishte rezultati përfundimtar i ndeshjes, pasi mysafirët nga Mitrovica ngushtuan epërsinë e vendasve në minutën e 80-të të takimit, sërish përmës shtatlartit, Mustapha, I cili u gjend më së miri para portierit vendas dhe shënoi nga afër.
Marrë në përgjithësi, skuadra e Lirisë dominoi takimin, dhe fitorja e saj ka mundur të jetë më e thellë, po qe se do t’i konkretizonin rastet e shumta që paten lojtarët vendas.
Në javën e ardhshme, skuadra e Lirisë do të udhëtojë për në Gjakovë, ku e pret dueli gjithashtu me rivalin e vjetër, skuadrën e Vëllaznimit.