Hoti për viktimat e gjenocidit: Presim nga Serbia të kërkojë falje

Shefi i ekzekutivit të shtetit, Avdullah Hoti ka thënë se në Ditën Ndërkombëtare të Përkujtimit të Viktimave të Gjenocidit i nderojmë me pietet të gjithë civilët e pafajshëm në botë.

Hoti përmes një postimi në “Facebook”, ka shkruar se vendi po ballafaqohet me plagën e madhe të të zhdukurve.

“Sot, si rrallëkush në historinë e vonshme të Evropës, vendi ynë vazhdon të ballafaqohet me plagën e madhe të të zhdukurve. Qindra familje tona ende presim me ankth ndonjë lajm për fatin e më të dashurve të tyre, të cilët u tretën pa shenjë gjatë krimeve dhe gjenocidit serb në Kosovë, më 1998-’99″, tha ai.

Po ashtu, kryeministri i vendit thotë se provat e çmendisë serbe në Kosovë nuk mund të zhbëhen.

“Bota e di çfarë ka ndodhur këtu; e di mirë kush ka qenë agresori, e kush viktima! Me gjithë pengesat e mëdha, dëshmitë e këtyre krimeve të kryera në zemër të Evropës, vazhdojnë të dalin në dritë! Prandaj, pohojmë fuqishëm se provat e çmendisë serbe në Kosovë nuk mund të zhbëhen, sepse ato janë parë dhe janë evidentuar nga mbarë komuniteti ndërkombëtar”, tha më tej Hoti.

Ndërkaq, ai ka deklaruar se presim nga Serbia që të kërkojë falje për krimet e kryera në Kosovë.

“Duke e mbajtur përherë në kujtesë, tragjedinë që ka përjetuar, Republika e Kosovës është e përkushtuar për të ardhmen paqësore të rajonit dhe integrimin në familjen e kombeve të lira demokratike euro perëndimore. Por, po ashtu, ne presim nga fqinji ynë verior, Serbia, të kërkojë falje për krimet dhe gjenocidin e kryer, të kërkojë falje për djegien e kufomave të civilëve shqiptarë, për varrosjen dhe zhvarrosjen e disahershme të tyre. Përveçse një akt moral, kërkim falja është edhe kusht elementar human për të ecur përpara kah pajtimi dhe mirëkuptimi në mes dy shteteve tona”, përfundoi Hoti.