Ushtruesja e detyrës së presidentes, Albulena Haxhiu, ka kërkuar nga Bashkimi Evropian që progresi i Kosovës në zbatimin e reformave të marrë përgjigje të qartë politike përmes avancimit drejt statusit të vendit kandidat dhe hapjes së negociatave për anëtarësim.
Këto komente Haxhiu i bëri gjatë takimit me Valentina Supertin, drejtoreshë për Ballkanin Perëndimor në Komisionin Evropian, e cila po qëndron për vizitën e saj të parë në Kosovë.
Sipas njoftimit të Presidencës, Haxhiu vlerësoi mbështetjen e vazhdueshme të BE-së për zhvillimin e Kosovës, duke theksuar se kjo mbështetje është shndërruar në institucione demokratike, reforma dhe orientim të qartë evropian, i cili, sipas saj, gëzon mbështetje të lartë nga qytetarët.
“U.D. Presidentja theksoi se Kosova ka mbajtur kurs të qartë në reformat evropiane, është plotësisht e harmonizuar me politikën e jashtme dhe të sigurisë të BE-së, dhe po i zbaton me seriozitet obligimet që dalin nga Agjenda e Reformave dhe Plani i Rritjes. Ajo kërkoi që progresi i Kosovës të marrë përgjigje të qartë politike nga Bashkimi Evropian përmes avancimit drejt statusit kandidat dhe hapjes së negociatave të anëtarësimit”, thuhet në njoftimin e lëshuar nga Zyra e Presidentes.
Gjatë takimit u diskutua edhe për rëndësinë e zbatimit të marrëveshjeve të Procesit të Berlinit dhe bashkëpunimit të barabartë rajonal.
Haxhiu theksoi se Kosova duhet të trajtohet në mënyrë të barabartë në përfaqësim, lidhje infrastrukturore, tregti, digjitalizim dhe qasje në iniciativat e tregut të përbashkët.
