Mbi 87% kanë shkuar në vendet me të ardhura të larta ose me të ardhura të larta dhe të mesme
Vendet e pasura kanë marrë shumicën dërrmuese të furnizimit në botë të dozave të vaksinave Covid-19, ndërsa vendet e varfra kanë marrë më pak se 1%, tha Organizata Botërore e Shëndetësisë në një konferencë shtypi.
Nga 700 milionë doza vaksinash që janë shpërndarë në të gjithë globin, “mbi 87% kanë shkuar në vendet me të ardhura të larta ose me të ardhura të larta dhe të mesme, ndërsa vendet me të ardhura të ulëta kanë marrë vetëm 0.2%”, tha Drejtori i Përgjithshëm i OBSH-së Tedros Adhanom Ghebreyesus.
Mesatarisht, 1 në 4 persona në vendet me të ardhura të larta kanë marrë një vaksinë koronavirus, krahasuar me vetëm 1 në më shumë se 500 në vendet me të ardhura të ulëta, sipas Tedros, transmeton Scan, përcjell albinfo.ch.
Tedros tha se ka një mungesë dozash për COVAX, një aleancë globale që synon t’u sigurojë vendeve të varfra vaksinat e koronavirusit. “Ne e kuptojmë se disa vende dhe kompani planifikojnë të bëjnë donacionet e tyre bilaterale të vaksinave, duke anashkaluar COVAX për arsyet e tyre politike ose komerciale,” tha Tedros. “Këto rregullime bilaterale rrezikojnë të ndezin flakët e pabarazisë së vaksinave.”
