Me ftesë të kryeprokurorit të Republikës së Bullgarisë, Borislav Sarafov në bashkëpunim me kryeprokurorin e Republikës së Turqisë, Muhsin Şentürk, ushtruesi i detyrës së kryeprokurorit të Shtetit, Besim Kelmendi, po merr pjesë në Forumin IV të kryeprokurorëve të Përgjithshëm të shteteve të Ballkanit, që po mbahet në Sofje të Bullgarisë. Së bashku me u.d. së kryeprokurorit të Shtetit, në këtë forum po marrin pjesë edhe prokurori i Zyrës së Kryeprokurorit të Shtetit, Aleksandër Lumezi, drejtori i Përgjithshëm i Sekretariatit të Këshillit Prokurorial të Kosovës, Sami Istrefi dhe shefi i Kabinetit të u.d. kryeprokurorit të Shtetit, Ardian Nikolla.

Zyra e Kryeprokurorit të Shtetit, në një komunikatë për media, bën të ditur se u.d. i kryeprokurorit të Shtetit ka mbajtur një fjalë rasti gjatë sesioneve të këtij forumi, ku ka theksuar rëndësinë e bashkëpunimit rajonal dhe ndërkombëtar në luftën kundër krimeve transnacionale. Ai, gjithashtu, ka vënë në dukje sfidat e krimeve me elemente ndërkombëtare, të cilat kërkojnë veprime të koordinuara dhe të vendosura, duke theksuar se asnjë shtet nuk mund t’i përballojë i vetëm këto kërcënime komplekse.

Kelmendi ka paraqitur arritjet e Prokurorisë Speciale të Kosovës në trajtimin e rasteve të krimit të organizuar dhe terrorizmit, si dhe progresin institucional të Prokurorit të Shtetit në sekuestrimin e pasurive të paligjshme.

U.d. kryeprokurori Kelmendi ka nënvizuar nevojën për ndërtimin e besimit të ndërsjellë mes prokurorive, avancimin e shkëmbimit të informacioneve, harmonizimin e praktikave dhe forcimin e bashkëpunimit ndërinstitucional dhe ndërkufitar.

Gjithashtu, ai ka bërë thirrje për veprime të koordinuara ndërmjet institucioneve ligjzbatuese të vendeve të Ballkanit, dhe për t’u arritur këto qëllime, sipas u.d. së kryeprokurorit të Shtetit, duhet të veprohet me efikasitet, integritet dhe mirëbesim reciprok dhe se kjo kërkon jo vetëm vullnet profesional, por edhe mbështetje të ndërsjellë për një rajon më të sigurt, më të drejtë dhe më të integruar.

Në këtë forum, i cili ka për qëllim forcimin e bashkëpunimit të prokurorive të vendeve të Ballkanit në çështjet e drejtësisë penale, kanë marrë pjesë edhe kryeministri i Bullgarisë, Rossen Jeliazkov, ministri i Drejtësisë së Bullgarisë, Georgi Georgiev, presidenti i Eurojust-it, Michael Schmid, sekretari i Përgjithshëm i Shoqatës Ndërkombëtare të Prokurorëve, Roel Dona, kryeprokurorë dhe prokurorë nga vendet e Ballkanit Perëndimor, si dhe vendet e tjera si: Bullgaria, Turqia, Sllovenia dhe Rumania.