Agresion i Serbisë i kryer në Kosovë më 24 shtator, i ka tensionuar edhe më tej raportet mes dyja vendeve.
Para gati dy javë, si pasojë e një sulmi mbi policinë e Kosovës në fshatin Banjskë të Zveçanit, u vra rreshteri Afrim Bunjaku.
Gazeta britanike “The Guardian” ka shkruar se liderët evropianë po mundohen të ndërmjetësojnë një takim mes presidentes Vjosa Osmani, dhe Aleksandar Vuçiqit.
“Vuçiq dhe Osmani do të marrin pjesë në një samit në Granada të 51 liderëve evropianë të enjten dhe burimet thonë se ka përpjekje për t’i bërë bashkë ata pavarësisht armiqësisë politike midis dy vendeve”, shkruan artikulli i “The Guardian”.
Presidentja e Kosovës Vjosa Osmani, dje gjatë një interviste në CNN tha se shteti serb duhet të sanksionohet për veprimet e saj në veri të Kosovës.
Osmani tha se akti i agresionit serb ishte i planifikuar, plan i ngjashëm me atë të Krimesë, për aneksimin e veriut.
“Është shumë me rëndësi që të sanksionohet e dënohet Serbia për veprimet e saj nga faktori ndërkombëtar. Çdo dëshmi tregon lidhjen direkt të shtetit serb me atë që ndodhi në veri të vendit.Armët që janë gjetur përdoren nga ushtria dhe shteti serb, e jo nga qytetarët serbë. Vuçiqi do të vazhdojë ta përdorë narrativen e Millosheviqit”, tha ajo.