Sindikata e Punëtorëve të Radio Televizionit të Kosovës i ka dërguar letër kryeministrit në detyrë, Albin Kurti, për ndërhyrje urgjente për alokimin e buxhetit të RTK-së.
Në letër thuhet se RTK gjendet në krizë institucionale e financiare të thellë, derisa Sindikata ka përmendur se institucioni është pa bord funksional, pozita e drejtorit të përgjithshëm është vakande dhe se drejtimi i RTK-së po mbahet me ushtrues detyre.
“Aktualisht, mbi 700 punëtorë të RTK-së kanë mbetur pa paga, dhe pas tyre qëndrojnë po aq familje që varen nga këto të ardhura për jetesën e përditshme. Kjo situatë është bërë e padurueshme, dhe rrezikon jo vetëm mirëqenien e punëtorëve, por edhe funksionimin normal të shërbimit publik të informimit në vend”, thuhet në letër.
Sindikata ka shkruar tutje se kërkon që në përputhje me rritjen e pagave në sektorë të tjerë, t’i mundësohet rritja e buxhetit për pagat RTK-së.
“Ne si Sindikatë nuk po kërkojmë asgjë më shumë se zgjidhje konkrete dhe ligjore. Nuk jemi të interesuar për përplasje apo interpretime politike — ajo që na intereson është pagesa e punës së ndershme të punëtorëve të RTK-së, që për muaj të tërë e kanë kryer detyrën e tyre me përkushtim, pavarësisht vështirësive”, ka thënë Sindikata.
Letër i ka dërguar edhe Kuvendit. Në të po ashtu kërkohen masa urgjente për RTK-në.
“Kërkojmë nga Kuvendi i Republikës së Kosovës që të ndërmarrë masa urgjente për zgjidhjen e kësaj gjendjeje dhe për të siguruar funksionimin e ligjshëm dhe të pandërprerë të RTK-së, në përputhje me ligjin dhe me përgjegjësinë publike ndaj qytetarëve”./KOHA