Qeveria e Kosovës ka dhënë detaje për takimin që kryeministri Kurti ka pasur sot me Përfaqësuesin e Lartë të BE-së, Josep Borrell dhe Përfaqësuesin e posaçëm të BE-së, Miroslav Lajçak.
Në takimin i cili është zhvilluar në Paris, ku palët po marrin pjesë në Forumin e Paqes, sipas Qeverisë është diskutuar për zhvillimet e fundit që lidhen me zbatimin e vendimit për targa, dhe propozimin franko-gjerman për normalizimin e marrëdhënieve Kosovë-Serbi, shkruan Gazeta Online Reporteri.net.
Kryeministri Kurti theksoi elementet e kornizës së marrëveshjes për normalizimin e plotë të raporteve me njohjen reciproke në qendër, ndërsa tha se propozimi franko-gjerman, që ka mbështetjen e Shteteve të Bashkuara të Amerikës dhe Bashkimit Evropian, i prezantuar nga emisarët Jens Plötner dhe Emmanuel Bonne, shërben si bazë e mirë për diskutime të mëtejshme.
“Dinamizimi i dialogut Kosovë-Serbi, zbatimi i vendimit për targat ilegale, zhvillimet e fundit në Kosovë, dhe çështje tjera aktuale ishin temat qendrore të takimit.
Kryeministri Kurti theksoi elementet e kornizës së marrëveshjes për normalizimin e plotë të raporteve me njohjen reciproke në qendër, ndërsa tha se propozimi franko-gjerman, që ka mbështetjen e Shteteve të Bashkuara të Amerikës dhe Bashkimit Evropian, i prezantuar nga emisarët Jens Plötner dhe Emmanuel Bonne, shërben si bazë e mirë për diskutime të mëtejshme”, thuhet në njoftim.
Ndërkaq, duke biseduar për zhvillimet e fundit në veri të vendit, Kryeministri Kurti ritheksoi se Qeveria e Republikës së Kosovës ka treguar vendosmërinë për sundimin e ligjit dhe përkushtimin në ruajtjen e paqes dhe sigurisë në vend.
Borrell dhe Lajçak gjatë ditës së sotme pritet të kenë takim edhe me presidentin serb Aleksandar Vuçiq. /Reporteri.net