Gjatë ditës së sotme, Kosova ka pranuar dërgesën e radhës të sistemeve raketore anti-tank OMTAS, të kontraktuara me prodhuesin shtetëror turk Roketsan në dhjetor të vitit 2023.
Këtë lajm e bëri të ditur ministri në detyrë i Mbrojtjes, Ejup Maqedonci.
E me rastin e pranimit të kësaj dërgese, është deklaruar edhe presidentja Vjosa Osmani.
“Faleminderit, Turqi”, shkroi ajo në një postim në Facebook në gjuhën turke.
Për këtë dërgesë të rëndësishme mbrojtëse ka reaguar edhe kryeministri në detyrë, Albin Kurti.
“Më të fortë, më të sigurt: sistemi antitank turk OMTAS, pjesë e arsenalit të ushtrisë sonë”, tha Kurti në Facebook.
Maqedonci ndërkaq tha se OMTAS (Orta Menzilli Tanksavar Silah) është një sistem modern raketor anti-tank me rreze të mesme veprimi, i zhvilluar për të neutralizuar mjete të blinduara moderne, përfshirë tanke me mbrojtje reaktive, si dhe fortifikata mbrojtëse ushtarake.