Drejtori i Përgjithshëm i Doganës së Kosovës, Agron Llugaliu, së bashku me bashkëpunëtorët e tij, të premten priti të Ngarkuarën me Punë të Ambasadës së Shteteve të Bashkuara të Amerikës në Kosovë, Anu Prattipati.

Dogana njofton se gjatë takimit, diskutimet u fokusuan në thellimin e bashkëpunimit në fushat e lehtësimit të tregtisë, forcimit të integritetit institucional dhe avancimit të kapaciteteve profesionale përmes programeve të asistencës teknike.

“Drejtori Llugaliu diskutoi për arritjet e deritanishme dhe shprehu gatishmërinë për intensifikimin e bashkëpunimit me synim rritjen e transparencës, sigurisë dhe efikasitetit doganor. Ai shprehu mirënjohjen e tij për mbështetjen e vazhdueshme të Shteteve të Bashkuara, duke theksuar se partneriteti strategjik me SHBA-në mbetet thelbësor për forcimin e kapaciteteve doganore dhe avancimin e standardeve të shërbimit për qytetarët dhe komunitetin e biznesit. E Ngarkuara me Punë të Ambasadës së SHBA në Kosovë, Anu Prattipati, mirëpret përpjekjet që forcojnë tregtinë dypalëshe dhe rritjen ekonomike për të dy vendet tona”, thuhet në njoftim.

Dogana e Kosovës tutje thekson se mbetet e përkushtuar për të vazhduar me reformat dhe modernizimin e proceseve, në bashkëpunim të ngushtë me partnerët ndërkombëtarë.