Kuvendari i Komunës së Prizrenit dhe njëherit kryetar i Bashkësisë Lokale të fshatit Vlashnje, Petrit Hoxhaj, ka ndërmarrë një iniciativë të veçantë për të ndihmuar zhvillimin e bletarisë. Ai ka mbjellë 50 ari me kulturën bujqësore kolzë, një bimë që njihet për përfitimet e saj të mëdha për bletët.
“Për herë të parë vendosa të mbjell kolzë – një dhuratë e çmuar nga natyra që luan një rol të rëndësishëm në ushqimin e bletëve në fillim të pranverës,” thotë Hoxhaj.
“Kur bletët dalin nga dimri të dobësuara, kolza lulëzon dhe u ofron atyre nektarin dhe polenin e nevojshëm për të rifituar energjinë.”
Hoxhaj është gjithashtu një bletar aktiv dhe posedoni disa koshere, ndërsa prej disa vitesh është prezent në treg me kompaninë e tij “Melina”, e cila prodhon mjaltë bio të certifikuar.
Iniciativa e tij është një shembull se si bujqësia dhe mjedisi mund të ndërveprojnë për të sjellë përfitime të ndërsjella. Kolza, përveç se ndihmon bletët në prodhimin e mjaltit, kontribuon edhe në ruajtjen e ekuilibrit të ekosistemit përmes mbështetjes së biodiversitetit.
“Qoftë kjo pranverë një stinë e begatë për bletët, për natyrën dhe për të gjithë ata që kujdesen për to,” shton Hoxhaj, duke shprehur shpresën që ky shembull të motivojë edhe fermerë të tjerë në rajon të investojnë në kultura që ndihmojnë ekosistemin.
