Presidentja e Republikës së Kosovës, Vjosa Osmani, dje qëndroi në Letoni, ku pati një mori takimesh zyrtare.

Mes të tjerash, Osmani vizitoi edhe Qendrën e Ekselencës së NATO-s për Komunikim Strategjik, që është një institucion kyç në luftën kundër kërcënimeve hibride, transmeton IndeksOnline.

“Diskutuam për thellimin e bashkëpunimit në ndërtimin e kapaciteteve në siguri kibernetike dhe komunikim strategjik, si pjesë e përpjekjeve të Kosovës për anëtarësim në NATO” u shpreh Osmani.

Presidentja më pas pati një diskutim me gratë liderë dhe aktiviste në Letoni, me të cilat ndau rrugëtimin e Kosovës si vend që ka përjetuar luftën.

“Si Kosova, ashtu edhe Letonia, mbijetuan përmes rezistencës dhe krenarisë kombëtare. Kujtesa kolektive është forca jonë – për të mos harruar të kaluarën e lavdishme dhe për të ndërtuar një të ardhme të drejtë e të sigurt” shkroi Osmani, në Facebook.