OJQ “EC Ma Ndryshe” ka njoftuar se në Prizren është mbajtur trajnimi dyditor “Avokim në Politika Mjedisore Gjithëpërfshirëse dhe Tranzicion të Gjelbër”, në kuadër të projektit “Horizonte të Gjelbra – Nisma e tranzicionit të gjelbër të udhëhequr nga të rinjtë dhe komuniteti në Kosovën Perëndimore”.
Sipas njoftimit, trajnimi mblodhi të rinj e të reja, përfaqësues të organizatave të shoqërisë civile, aktivistë, mësimdhënës dhe nxënës të shkollave të mesme, me synimin e fuqizimit të njohurive dhe aftësive të tyre në fushën e avokimit për politika mjedisore, si dhe nxitjen e pjesëmarrjes aktive në proceset e tranzicionit të gjelbër.
Siç bëhet e ditur, gjatë dy ditëve të aktivitetit, pjesëmarrësit u njohën me konceptet kryesore që lidhen me tranzicionin e gjelbër, ndryshimet klimatike, efiçiencën e energjisë, ekonominë qarkore dhe politikat relevante të Bashkimit Evropian dhe Kosovës në fushën e mjedisit.
Tutje, bëhet e ditur se përmes sesioneve ndërvepruese, diskutimeve dhe punës praktike në grupe, ata analizuan sfidat mjedisore me të cilat përballen komunitetet e tyre dhe shqyrtuan mundësi konkrete për adresimin e tyre përmes avokimit dhe bashkëpunimit me institucionet lokale.
“Në kuadër të trajnimit, pjesëmarrësit hartuan plane veprimi për angazhimet e ardhshme në komunitetet e tyre, me fokus në promovimin e politikave mjedisore gjithëpërfshirëse dhe të qëndrueshme. Ata gjithashtu punuan në identifikimin e aktorëve relevantë, formulimin e mesazheve avokuese, zhvillimin e kërkesave konkrete dhe simulimin e proceseve të dialogut me vendimmarrësit” – thuhet në njoftim.
Sipas EC-it, ky trajnim synon të kontribuojë në krijimin e një rrjeti të të rinjve dhe aktorëve lokalë të gatshëm për të promovuar zgjidhje të qëndrueshme mjedisore dhe për të luajtur një rol aktiv në proceset e tranzicionit të gjelbër në Kosovën Perëndimore.
Siç bëhet e ditur, ky aktivitet zhvillohet në kuadër të projektit “Horizonte të Gjelbra – Nisma e Tranzicionit të Gjelbër nga të Rinjtë dhe Komuniteti në Kosovën Perëndimore”, të zbatuar nga EC Ma Ndryshe në partneritet me Care International Balkans dhe me mbështetjen e Bashkimit Evropian, si dhe me Syrin e Vizionit si bashkë-zbatues.
