Policia e Kosovës ka njoftuar se në Gjakovë janë gjetur mbetje eshtërore të cilat dyshohet se janë të një personi të zhdukur gjatë luftës në Kosovë.
“Ekipet policore në koordinim me Institutin e Mjekësisë Ligjore dhe njësitet tjera kompetente kanë hasur në mbetje eshtërore, të cilat dyshohet se i përkasin së paku një individi-personi, që figuron në listën e personave të zhdukur gjatë luftës së fundit në Kosovë 1998-1999”, thuhet në raportin 24-orësh të Policisë.
Mbetjet eshtërore thuhet se janë tërhequr nga Instituti i Mjekësisë Ligjore për ekzaminime të mëtutjeshme mjeko-ligjore.
Të zhdukur me dhunë gjatë luftës në Kosovë konsiderohen edhe afro 1.600 persona, ndërsa institucionet e Kosovës vazhdimisht kanë akuzuar Serbinë për mungesë bashkëpunimi për zbardhjen e fatit të tyre.
Gjatë vitit që shkoi, janë bërë gërmime në 32 lokacione të ndryshme, në kërkim të personave të zhdukur gjatë luftës. Kjo ka rezultuar me gjetjen e mbetjeve mortore të 16 personave që dyshohen si të zhdukur./KOHA
Klikoni KËTU për tu bërë pjesë e kanalit të TV Prizreni në Youtube.
