Ka ndërruar jetë në moshën 85-vjeçare Hysen Bukoshi, atdhetar dhe veprimtar i çështjes kombëtare, i cili vuajti burgjet e ish-Jugosllavisë dhe të Shqipërisë komuniste.
I lindur më 1 janar 1941 në Bukosh të Therandës, Bukoshi u përball herët me përndjekjet politike për shkak të veprimtarisë së tij kombëtare. Pas arrestimit në Prizren, ai u dënua dhe vuajti burgun e Nishit në ish-Jugosllavi.
Pas lirimit, në vitin 1969 u largua për në Shqipëri, ku vazhdoi veprimtarinë e tij, por edhe atje u përball me përndjekjet e regjimit komunist. Në vitin 1975 u dënua me dhjetë vjet burg dhe iu konfiskua pasuria, ndërsa një pjesë të dënimit e vuajti në burgun e Ballshit.
