PRIZRENI ME RAJON

Liria luan për herë të parë nën reflektorë, Ahmeti fton tifozët: “Po ndërtojmë histori, ky është vetëm fillimi!”

Liria luan për herë të parë nën reflektorë, Ahmeti fton tifozët: “Po ndërtojmë histori, ky është vetëm fillimi!”
TV Prizreni
TV Prizreni
19 Nëntor 2026, 15:49

Gazetari shumëvjeçar i lindur në Prizren, Arben Ahmeti, i cili para disa muajsh është zgjedhur Drejtor i Përgjithshëm i KF Liria, ka vlerësuar angazhimin, punën e përbashkët dhe rezultatet e arritura gjatë periudhës së tij në krye të klubit. Ai thotë se këtë pozitë nuk e ka parë vetëm si detyrë, por si përgjegjësi ndaj një klubi që përfaqëson historinë, identitetin dhe krenarinë e Prizrenit. Në një shkrim në facebook, Ahmeti ka theksuar se gjatë muajve të fundit është punuar në krijimin e një ambienti kredibil, me frymë të mirë bashkëpunimi, besim të ndërsjellë dhe rezultate pozitive, duke shtuar se synimet e klubit janë shumë më të mëdha se sukseset e deritanishme.

“E gjithë kjo është dëshmi se kur ka vullnet, përkushtim, punë dhe dashuri për klubin, rezultatet nuk mungojnë”, ka shkruar Ahmeti, duke vlerësuar angazhimin e tij dhe bashkëpunëtorëve në klub.

Ai ka bërë të ditur se e diela do të sjellë një moment të veçantë për Prizrenin, pasi për herë të parë në historinë e qytetit, një ndeshje futbolli do të zhvillohet në mbrëmje, nën dritën e reflektorëve të stadiumit. Në këtë mbrëmje, Liria pritet të festojë edhe shpalljen kampione vjeshtore.

Me këtë rast, Ahmeti ka ftuar tifozët dhe qytetarët që të jenë sa më shumë në stadium, për t’i dhënë mbështetje ekipit dhe për ta bërë këtë ngjarje një festë të veçantë për klubin dhe qytetin.

“Prandaj, ftesa ime është e sinqertë dhe vjen nga zemra: të dielën, në orën 17:00, ejani sa më shumë në stadiumin e qytetit. Ejani të dëshmojmë dashurinë për Prizrenin, për ngjyrat tona dhe për klubin që na bashkon të gjithëve”, ka shkruar ai.

Ahmeti ka theksuar se synimi i tyre nuk është vetëm arritja e rezultateve sportive, por ndërtimi i një klubi me ambicie më të mëdha, që në të ardhmen të jetë krenari për Prizrenin, futbollin e Kosovës dhe rajonin.

“Ne nuk po luftojmë vetëm për rezultate. Ne po ndërtojmë histori. Po ndërtojmë themelet e një klubi që synon shumë më lart”, ka përfunduar Ahmeti.

Ndeshja e së dielës do të zhvillohet në orën 17:00, në stadiumin e qytetit “Përparim Thaçi”, ku pritet prania e tifozëve të Lirisë për ta përkrahur ekipin në këtë moment të rëndësishëm të sezonit.

Klikoni KËTU për tu bërë pjesë e kanalit të TV Prizreni në Youtube.

Të tjera nga rubrika