Kandidati për kryeministër Lidhjes Demokratike të Kosovës, Lumir Abdixhiku, nga tubimi masiv në Prizren, e cilësoi këtë qytet si simbol të trashëgimisë kombëtare dhe frymës së bashkimit të së djathtës.
“Mirëmbrëma, Prizren! Qytet i Lidhjes së parë, i kulturës shumëngjyrëshe, i arkitekturës që flet për historinë tonë, i njerëzve bujarë dhe mikpritës. Prizreni, kështjellë e vlerave kombëtare, djep i trashëgimisë tonë shpirtërore – prej Shadërvanit e deri te Kalaja, prej lagjeve ikonike deri te rrugët plot gjallëri. Prizren, i bukur Prizren, djep i Lidhjes!”
Ai theksoi ndjenjën e veçantë që thirrja e LDK-së për ndryshim “po jehon edhe në padyshim qytetin më të bukur të Kosovës.”
“Më duhet të them, se s’ka ndjenjë më të fuqishme, s’ka emocion më të madh, s’ka mirënjohje më të thellë se sa kur shoh që thirrja e nisur në qytetet tjera, po jehon edhe në padyshim qytetin më të bukur të Kosovës, në Prizrenin tuaj, në Prizrenin tim, në Prizrenin e Lidhjes, Lidhjes së Shqiptarëve e vet Lidhjes Demokratike të Kosovës.” – tha ai.