Kryeministri i Kosovës, Albin Kurti ka thënë se deri më tani vlera e mjeteve të mbledhura në Fondin e Sigurisë është shtatë shifrore.
Kurti ka shtuar se deri në fundjavë numri i donacioneve ka qenë katër shifrore, përcjell Telegrafi.
“Ajo që unë di, numri i donacioneve për Fondin e Sigurisë deri në këtë fundjavë ka qenë katër shifrorë, ndërsa, numri i mjeteve të mbledhura është shtatë shifrorë. Për shifra të sakta mund të ju tregojë Ministria e Financave”, ka thënë Kurti.
Gjatë javës së kaluar është themeluar Fondi i Sigurisë, ku kryeministri kishte ftuar qytetarët e Kosovës, mërgatën dhe donatorë të tjerë të kontribuojnë për sigurinë e vendit.
“Mjetet e mbledhura financiare synohet të përdoren në përputhje me strategjinë e sigurisë shtetërore të Republikës së Kosovës që pritet të miratohet nga Qeveria e Republikës se Kosovës. Funksionimi i këtij fondi do të rregullohet me akte përkatëse procedurale dhe do të përdoret ekskluzivisht për qëllimin e përcaktuar nga qeveria”, pati theksuar ai. /Telegrafi/