Kryeminsitri në detyrë, Albin Kurti, teksa ka shprehur ngushëllime për familjarët e 27-vjeçarit Agon Zejnullahu, ka thënë se institucionet nuk do të strehojnë askënd që ka tejkaluar kompetencat zyrtare.
“Pres hetim të thellë dhe sa më të shpejtë që zbardh të vërtetën e plotë dhe i bën të njohura të gjitha rrethanat, në mënyrë që të vendoset drejtësia dhe të arrihet llogaridhënie. Nuk do të ketë strehë për askënd që ka tejkaluar kompetencat apo ka thyer ligjin gjatë detyrës zyrtare”, ka thënë Kurti në nisje të mbledhjes së Qeverisë në detyrë.
Ai ka thënë se bashkëpunimi mes Policisë, Inspektoratit Policor të Kosovës (IPK), Institutit të Mjekësisë Ligjore (IML) dhe Prokurorisë është kyç për të zbardhur të vërtetën.
“Lajmi për vdekjen e tij na ka tronditur të gjithëve. Shumëçka prej asaj që ka ndodhur në natën e 7 korrikut është publike falë incizimeve të dëshmitare. Por për të kuptuar gjithçka çfarë ka ndodhur, duhet hetim profesional nga institucionet”, ka thënë ai.
Ai ka thënë se diskutimet publike dhe gjykimet janë të vështira për familjen dhe miqtë e të ndjerit, ndërkaq tendenca për anti fushatë ndaj Policisë së Kosovës nuk është zgjidhje.