Kryenegociatori i Republikës së Kosovës me Bashkimin Evropian, Jeton Zulfaj, ka zhvilluar një vizitë në Suedi, ku në qendër të takimeve me zyrtarë suedezë dhe institucione partnere ka qenë avancimi i procesit të integrimit evropian të Kosovës, me theks të veçantë në marrjen e statusit të vendit kandidat dhe hapjen e negociatave për anëtarësim në Bashkimin Evropian.
Gjatë takimit në Stokholm me ambasadorin Torbjörn Sohlström, Drejtor i Përgjithshëm dhe Shef i Departamentit për Çështje Evropiane në Ministrinë e Punëve të Jashtme të Suedisë, Zulfaj theksoi se Kosova ka bërë progres në agjendën e reformave dhe se ka ardhur koha për hapa të rinj në raport me BE-në.
“Z. Zulfaj theksoi progresin që Kosova ka bërë në rrugën e saj evropiane, duke nënvizuar se tani është koha që Kosova të marrë statusin e vendit kandidat dhe të hapë negociatat e anëtarësimit. Ai theksoi se pikërisht procesi i anëtarësimit është ai që sjell reformat e nevojshme për zhvillim dhe përparim të qëndrueshëm të vendit”- thuhet në komunikatë.
Në këtë takim, kryenegociatori kosovar falënderoi Suedinë për mbështetjen e vazhdueshme ndaj Kosovës, duke vlerësuar rolin e saj si një nga pesë donatorët më të mëdhenj të vendit dhe si mbështetëse e integrimit evropian të Kosovës.
Po ashtu, zyra e tij ka bërë të ditur se gjatë vizitës në Agjencinë Suedeze për Bashkëpunim Ndërkombëtar për Zhvillim (SIDA), Zulfaj diskutoi me Petra Burcher, Udhëheqëse e Njësisë për Ballkanin Perëndimor dhe Turqinë, për progresin e Kosovës në zbatimin e Agjendës së Reformave në kuadër të Planit të Rritjes së BE-së.
“Ai foli për progresin e Kosovës në zbatimin e Agjendës së Reformave në kuadër të Planit të Rritjes së BE-së dhe prioritetet e vendit në rrugën drejt anëtarësimit në BE”- thuhet në komunikatë.
Sipas njoftimit, Zulfaj theksoi përkushtimin e institucioneve të Kosovës për të rritur kapacitetet në zbatimin e reformave dhe për të shfrytëzuar sa më mirë mbështetjen e partnerëve ndërkombëtarë.
Vizita në Suedi përfshiu gjithashtu takime në Institutin Suedez dhe në Parlamentin suedez (Riksdag), ku u diskutua për mbështetjen suedeze ndaj Kosovës dhe perspektivën evropiane të vendit – në këtë të fundit janë dy deputetë shqiptarë.
“Gjatë vizitës në Suedi, krahas takimeve që zhvillova në Ministrinë e Punëve të Jashtme, Agjencinë Suedeze për Bashkëpunim Ndërkombëtar për Zhvillim (Sida) dhe Institutin Suedez, pata kënaqësinë të vizitoj edhe Riksdagun, Parlamentin e Suedisë, ku u takova edhe me dy deputetët nga Partia Socialdemokrate, znj. Aida Birinxhiku dhe z. Arber Gashi”- ka shkruar Zulfaj.
Gjatë vizitës, Zulfaj tregoi se gjatë takimit me Kurt Bratteby, Drejtor i Departamentit për Marrëdhënie Ndërkombëtare biseduan për mundësitë dhe sfidat në procesin e anëtarësimit dhe se si edhe shumë të rinj e profesionistë nga Kosova përfitojnë nga shkëmbimet, praktikat dhe programet për nëpunës civilë, në bashkëpunim me universitetet suedeze dhe institucionet kosovare.
