Komuna e Prizrenit, përkatësisht Drejtoria e Kulturës, Rinisë dhe Sportit, ka shpallur një thirrje publike për të gjitha organizatat joqeveritare (OJQ) dhe individët që veprojnë në këtë komunë, duke i ftuar ata të aplikojnë për mbështetje financiare.
Kjo thirrje u drejtohet OJQ-ve të regjistruara në Republikën e Kosovës, si dhe individëve që zhvillojnë aktivitete në fushën e kulturës, rinisë dhe sportit, me kusht që programet e tyre të përfshijnë iniciativa dhe projekte të realizuara në territorin e Komunës së Prizrenit.
Sipas njoftimit zyrtar, qëllimi i kësaj thirrjeje është të mbështesë projektet që kontribuojnë në zhvillimin dhe avancimin e jetës kulturore, rinore dhe sportive në komunë, duke inkurajuar pjesëmarrjen aktive të komunitetit dhe organizatave relevante.
