Kryeministri në detyrë i Kosovës, Avdullah Hoti, ka takuar sot menaxhmentin dhe bordin e Trepçës, me të cilët bisedoi për situatën në të cilën po kalon kjo ndërmarrje e rëndësisë strategjike për ekonominë e Kosovës.
“Ka kaluar nëpër një periudhe të vështirë, kryesisht si rezultat i zhvillimeve në tregjet financiare ndërkombëtare dhe në pamundësi që të depërtohet dhe të shiten produktet e Trepçës në ato tregje. Tash ngadalë po përmirësohet situata”, tha Hoti.
Ai e përgëzoi bordin dhe menaxhmentin për veprimet që i kanë ndërmarrë në veçanti në tre muajt e fundit, për të stabilizuar gjendjen dhe për të rritur prodhimin.
Sipas Hotit, viti 2020 ka qenë ndër vitet më të suksesshme sa i përket prodhimit në Trepçë.
“Besoj se me përmirësimin e tregjeve financiare ndërkombëtare, në tregjet përkatëse ku shiten produktet e Trepçës, shpejt kjo kompani do ta merr vetën, por tani duhet ta mbështesim”, tha kryeministri Hoti.