Rasim Demiri nga koalicioni “Vakat” ka njoftuar se përfaqësuesit e disa fshatrave të Luginës së Lumbardhit (Zhupës) kanë takuar drejtorin e distriktit të KEDS-it në Prizren, Senad Domuzeti për të shqyrtuar sfidat sa i përket furnizimit me energji elektrike.
Demiri ka bërë të ditur se me nismën e Eldis Abazit, përfaqësues nga fshatrat Reçanë, Nebregoshtë, Planjanë, Manastiricë dhe Mushnikovë, kanë zhvilluar takimin me drejtuesit e KEDS-it në Prizren, ku temat kryesore kanë qenë prishjet e shpeshta, reduktimet si dhe planet për rrjetin e largpërçuesit të ri, raporton Telegrafi.
Sipas tij, drejtori Domuzeti ka bërë të ditur se projekti për Zhupën parashihet që të realizohet gjatë vitit 2025, me një investim të përgjithshëm prej 900 mijë eurosh, dhe se rikonstruksioni i rrjetit elektrik parasheh rritjen e kapacitetit nga 10 KV aktuale në 20 KV. Po ashtu ka theksuar se në të gjitha fshatrat e Zhupës është planifikuar instalimi i kabllove nëntokësore, të cilat do të lidhin nënstacionet e reja me largpërçuesit.
Kryetari i fshatit Planjanë, Safet Saliji, ka theksuar problemin e linjës së tensionit të lartë për këtë vendbanim dhe ka marrë sqarime se ky lokalitet do të përfshihet në projekt në vitin 2025. Gjithashtu, në projekt do të përfshihen edhe fshatrat, Llokvicë dhe Drajçiç, me një trase të re të linjës së tensionit të lartë.
Përfaqësuesi i fshatit Nebregoshtë, Nexhi Murati, ka paraqitur nevojën për një rikonstruksion të plotë të rrjetit në njërën prej lagjeve të fshatit, si dhe problemin që kabllot janë të vendosura në një lartësi të pamjaftueshme, e që sipas tij pengon edhe kalimin e automjeteve të mëdha.
Përveç Zhupës, sipas njoftimit të Demirit në takim është diskutuar edhe për Podgurin, ku do të bëhet çmos që në vitin 2025 të ketë investime edhe në rrjetin për fshatrat Gërnqarë, Skorobishtë dhe Novosellë, raporton Telegrafi.
Ai ka konstatuar se ky takim ka shënuar një hap të rëndësishëm drejt zgjidhjes së problemeve dhe përmirësimit të infrastrukturës elektro-energjetike në Zhupë dhe Podgur, gjë që sipas tij do të kontribuojë në përmirësimin e kushteve të jetesës për të gjithë banorët e kësaj ane.
