Presidenti amerikan, Joe Biden, ka thënë se forcat amerikane kanë eliminuar një kërcënim të madh terrorist për botën duke vrarë liderin global të ISIS-it.

“Forcat ushtarake të Shteteve të Bashkuara të Amerikës eliminuan me sukses një kërcënim të madh terrorist për botën, liderin global të ISIS-it. Falë trupave tona, ky udhëheqës i tmerrshëm terrorist nuk është më”, ka thënë ai.

Biden i është adresuar amerikanëve nga Shtëpia e Bardhë pasi Forcat Speciale Amerikane kryen një mision kundër terrorizmit në veriperëndim të Sirisë mbrëmë, duke vrarë liderin e ISIS-it Abu Ibrahim al-Hashimi al-Qurayshi.

Presidenti amerikan ka treguar se ky mision është kryer përmes sulmit të Forcave Speciale në vend të një sulmi ajror për të minimizuar vdekjen e civilëve.