Gruaja e cila ka hyrë në librin “Guiness” me punimet e saj është emëruar ushtruese e detyrës në çerdhen publike “Nëna Zahide” në komunën e Skenderajt.
Arbnora Fejza Idrizi, e cila me punimet e “Origamit” dhe “Mozaikut me flamurin e Kosovës” ka prekur rekordet botërore, tha në emisionin Info Magazine në Klan Kosova se Kosova njihet si një vend paragjykues, por se njerëzit nuk duhet të vlerësohen nga pamja e jashtme por nga puna dhe suksesi.
“Ne duhet t’i tejkalojmë këto paragjykime edhe pse njihemi si një vend paragjykues ne nuk duhet të vlerësohet pamja e një individi por puna dhe suksesi. Është e drejtë e secilit që të vishet ashtu si ndihet apo është e drejtë e tij të përcaktohet në veshjen e tij”.
Fejza-Idrizi theksoi se po ndihet e vlerësuar me emërimin e saj në këtë pozitë.
Ajo shtoi se do të mundohet që detyren e besuar nga kryetari i komunës së Skenderajt, Bekim Jashari, ta kryejë me përgjegjësi dhe të shënojnë suksese.
“Jam ndjerë shumë e vlerësuar. Edhe përkundër faktit se ne jemi pak vend paragjykues unë nuk jam ndjerë aspak e paragjykuar. Unë jam mundur që me punën time t’i thyej këto paragjykime dhe të tregojë se ti me punë mund të arrish çdo gjë, ndoshta edhe majat e suksesit. Unë jam ndjerë e vlerësuar edhe krenare që jam emëruar si ushtruese e detyrës së drejtoreshës së kësaj çerdhe që ka një emër të madh. Do të mundohem që punën ta kryejë me përgjegjësi dhe të shënojmë suksese”.
