Sot pasdite është publikuar dosja paraprake e mbrojtjes së ish-presidentit të Kosovës, Hashim Thaçi në Speciale.
Në të janë përshkruar disa situata, që sipas mbrojtjes dëshmojnë që UÇK-ja nuk kishte strukturë të organizuar apo ndonjë grup të veçantë në krye që merrte të gjitha vendimet, kontrollonte politikat kundër individëve apo çështje të tjera.
Në këtë dosje, avokati Gregory Keohe ka përshkruar edhe angazhimin e Thaçit në Ushtrinë Çlirimtare të Kosovës.
Ai thotë se Thaçi nuk ishte ushtar i trajnuar edhe s’kishte kontroll efektiv mbi trupat e UÇK-së.
Vlera e Thaçit, siç përshkruan avokati i Thaçit në Hagë, vinte nga aftësitë e tij si komunikues.
“Zoti Thaçi nuk ishte një ushtar i trajnuar dhe nuk kishte kontroll efektiv mbi trupat. Vlera e tij vinte nga aftësitë e tij si komunikues, si mes bashkëmoshatarëve dhe jashtë tij. Ai gjithashtu vinte nga njohja e tij se UÇK-ja nuk përputhej me forcën apo aftësitë ushtarake të forcave serbe, dhe se mbijetesa e komunitetit të tij kërkonte ndihmën e bashkësisë ndërkombëtare. Vlera e z. Thaçi ishte në aftësinë e tij për të komunikuar me ta, dhe me shtypin vendas dhe ndërkombëtar. Si i tillë, teatri i tij i luftës ishte në thelb jashtë Kosovës, në një rol më shumë të ngjashëm me një diplomat sesa një ushtar”, thotë Keohe në parashtresën e tij.
Keohe tutje ka përshkruar edhe për datat e rëndësishme, që janë të kobshme për kosovarët, ato të masakrave.
Në veçanti, Keohe ndalet tek masakra ndaj Jasharëve dhe rezistenca e tyre.
Kjo ndodhi, siç risjell në kujtim Keohe, kishte shkaktuar një mobilizim masiv të shqiptarëve përmes protestave dhe bashkëngjitjes masive në UÇK-së, e cila s’kishte as armë në atë kohë.
