Një person është arrestuar në një fshat të Malishevës për lëndë narkotike. Policia në një komunikate për media ka njoftuar se gjithashtu ka sekuestruar mbi 30 kilogramë substancë narkotike.
Bëhet e ditur se hetuesit policorë nga Sektori Qendror i Hetimeve të Drejtorisë për Hetimin e Trafikimit me Narkotik sot rreth orës 15:00, gjatë trajtimit të një informate, kanë arritur ta lokalizojnë e më pas ta arrestojnë një person nën dyshimin për përfshirje në veprimtari penale.
“Policia ka siguruar urdhër për kontroll nga organet e drejtësisë, meqë rast është kontrolluar shtëpia e të dyshuarit në një fshat të Malishevës. Gjatë kontrollit, policia në shtëpinë e të dyshuarit: A.K., (viti i lindjes 1991, mashkull kosovar), ka gjetur dhe konfiskuar tri çanta në të cilat kishte 28 paketime me substancë narkotike. Pesha e përgjithshme e kësaj lënde është 30 kg e 330 gramë”, thuhet në njoftim.
Policia ka intervistuar të dyshuarin dhe ndaj tij ka iniciuar rastin “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Me aktvendim nga prokurori, i dyshuari është dërguar në mbajtje deri në 48 orë.
