Ministrja e Drejtësisë, Albulena Haxhiu dhe shefi i Grupit Parlamentar të PDK-së, Abelard Tahiri janë përplasur sot mes vete në Kuvend.
Shkak u bë shqyrtimi i dytë i Projektligjit për deklarimin, prejardhjen dhe kontrollin e pasurisë dhe të dhuratave.
Tahiri i PDK-së kërkoi që profesorët dhe mjekët të largohen nga Projektligji për deklarimin e pasurisë.
Sipas tij, asnjëra kategori nuk është i ekspozuar ndaj korrupsionit dhe aferave korruptive.
“Kemi kërkuar që të kemi një dakordim që profesorët e universitetit dhe mjekët të largohen nga listat e deklarimeve…Ne jemi kundër pasi ata nuk janë një kategori që menaxhojnë me paratë publike, mjekët po ashtu, pasi nuk janë një kategori që menaxhojnë me paranë publike, s’janë të ekspozuar ndaj korrupsionit dhe aferave korruptive”, tha ai.
Haxhiu tha se propozimi i tyre është që dy këto kategori duhet të deklarojnë pasurinë, mirëpo që ai mos të jetë publik.
“Propozimi i Qeverisë së Kosovës ka qenë që edhe mjekët dhe profesorët universitar të deklarojnë pasurinë, por deklarimi të mos jetë publik. Pasi kur është hartuar strategjia për sundimin e ligjit, ka rezultuar se këto janë profesione të ndjeshme dhe duhet të adresohet deklarimi i pasurisë së tyre”, theksoi ajo.