Dy persona kanë mbetur të plagosur si pasojë e të shtënave me armë zjarri që kanë ndodhur mbrëmjen e së hënës në qytetin e Prizrenit.
Sipas raportit të Policisë së Kosovës, më 05 janar 2026, rreth orës 22:50, policia ka pranuar informacion se në rrugën “Ali Hadri” kishte të shtëna me armë zjarri. Menjëherë pas njoftimit, në vendngjarje janë angazhuar patrulla policore.
Të dyshuarit nuk janë hasur në vendin e ngjarjes, ndërsa nga informacionet e siguruara në terren rezulton se si pasojë e të shtënave dy persona kanë pësuar lëndime dhe janë dërguar për trajtim mjekësor në Emergjencën e Spitalit Rajonal të Prizrenit.
Sipas ekipit mjekësor, të plagosurit F.T. dhe V.H., të dy nga Prizreni, janë jashtë rrezikut për jetë dhe po vazhdojnë trajtimin e mëtejmë mjekësor.
Në vendngjarje kanë dalë njësi të ndryshme policore, hetuesit kujdestar nga Stacioni Policor Prizren, si dhe hetues nga Sektori Rajonal i Hetimeve, të cilët kanë ndërmarrë të gjitha veprimet e nevojshme për sigurimin dhe ekzaminimin e vendit të ngjarjes. Po ashtu, patrulla policore janë angazhuar edhe në emergjencën spitalore për sigurimin e viktimave gjatë trajtimit.
Lidhur me rastin janë njoftuar Hetimet Rajonale, ndërsa policia ka bërë të ditur se rasti është nën hetime dhe se po punohet intensivisht për identifikimin dhe arrestimin e personave të përfshirë.