2 mijë raste të reja me kancer paraqitën për çdo vit në Kosovë ndërsa problem mbetet diagnostikimi i vonuar e mungesa e programeve të skriningut, ka bërë të ditur Ministria e Shëndetësisë në Ditën Botërore kundër kancerit.
Kjo Ministri tha se në Kosovë gratë janë më të prekura nga kanceri i gjirit ndërsa meshkujt nga kanceri i mushkërive.
“Edhe në Kosovë, ky problem është gjithashtu i dukshëm, me rreth 2,000 raste të reja çdo vit. Gratë janë më të prekurat nga kanceri i gjirit, ndërsa meshkujt nga kanceri i mushkërive. Problemet kryesore mbeten diagnostikimi i vonuar dhe mungesa e programeve të skriningut, si dhe ndërgjegjësimi i pamjaftueshëm për rrezikun që paraqet kanceri”- ka njoftuar Ministria e Shëndetësisë.
Përfshirja e vaksinës kundër Human Papilloma Virusit (HPV) në kalendarin kombëtar të vaksinimit është parë si hap i rëndësishëm drejt parandalimit të kancerit.
Ndërsa si qëllim për të ardhmen Ministria e Shëndetësisë ka parë zgjerimin e programeve të skriningut për kancerin e gjirit dhe qafës së mitrës, përmirësimin e infrastrukturës shëndetësore, dhe rritjen e ndërgjegjësimit të popullatës për rëndësinë e diagnostikimit të hershëm.
Në Kosovë këtë vit Dita Ndërkombëtare kundër kancerit shënohet me moton “Të bashkuar nga e veçanta”.