Presidenti serb Aleksandar Vuçiq tha se ka vendosur ta dekorojë ish-emisarin e posaçëm të Shteteve të Bashkuara të Amerikës për dialogun Kosovë-Serbi, Richard Grenell “për kontributin e tij në përparimin e Serbisë”.
Sipas raportimeve të mediave serbe, Vuçiq këtë e bëri të ditur në një konferencë për media me ç`rast tha se ky nderim për Grenellin bëhet “ për faktin se ka qenë gjithmonë i gatshëm të dëgjojë interesat e Serbisë dhe për faktin se ka mbrojtur që investimet amerikane të vijnë në Serbi”
I pyetur nëse qeveria e paguan Grenellin dhe cilat janë meritat e tij që meriton urdhrin nga shteti i Serbisë, Vuçiq tha se mendon se qeveria nuk e paguan.
“Nuk e kam idenë, nuk jam në qeveri. E di që e keni mashtruar publikun me histori që i kam paguar Blairin, Schroedeinr, Gusenbauerin, Klintonët.. Besoj se kështu është edhe në këtë rast”, iu përgjigj Vuçiq pyetjes së gazetarit të televizionit serb N1.
Vuçiq ka theksuar se vendimi për dekorimin e Grenelit është marrë nga ai personalisht dhe se nuk ka lidhje me qeverinë.