Avokati Arianit Koci e ka çuar në Librin e Rekordeve Guinness, çështjen e konstituimit ë Kuvendit të Kosovës.
Këtë e ka bërë të ditur në një status në Facebook, duke shtuar se e ka paraqitur rastin më absurd ndonjëherë.
“Aplikova në Librin e Rekordeve Guinness. Si qytetar i Kosovës – e paraqita rastin absurd që po ndodh në vendin tim: 48 herë rresht ka dështuar konstituimi i Kuvendit të Republikës së Kosovës. Po, dyzet e tetë tentime – dhe ende pa Kuvend funksional. Turp, turp, turp”, ka thënë ai.
Koci ka shtuar se kjo nuk ka ndodhur askund në botë – as në vendet me krizë të thellë institucionale, e madje as në shtetet me përçarje etnike, sektare apo politike.
Ka deklaruar se ky veprim është në vazhdën e protestës së tij qytetare, që ka nisur para Kuvendit.
“(Kjo ndodhë v.j. )Vetëm te ne – në një shtet që vetëquhet demokratik. Bllokimi i institucioneve tani është çështje e rendit demokratik, e të drejtave të qytetarëve dhe e funksionimit të shtetit. Nëse Guinness e pranon, të paktën ta dimë që jemi ‘të parët në botë’ për diçka – për një rekord turpi”, ka thënë ai.
Ai ka paralajmëruar të hënën sërish protestë.