Zyra e Rregullatorit të Energjisë Elektrike (ZRRE) ka reaguar sot pas një aksioni të zhvilluar në objektin e ZRRE-së nga aktivistët e grupit “Asnjë cent më shumë”, të cilët qëllimin kishin kundërshtimin e paralajmërimeve për rritjen e çmimit të energjisë elektrike për 15%, shkruan Gazeta Sinjali.
Në reagimin e tyre, ZRRE-ja është shprehur se është e vetëdijshme për shqetësimet e qytetarëve lidhur me procesin e tanishëm tarifor, por të mos pengohet ushtrimi i detyrave të tyre.
“ZRRE respekton të drejtën e qytetarëve për të protestuar në mënyrë paqësore, si një e drejtë e garantuar nga ligjet e Republikës së Kosovës.
ZRRE në vazhdimësi angazhohet për një proces të hapur, të drejtë dhe transparent në shqyrtimin e çdo komenti nga qytetarët dhe palët e interesuara, duke siguruar që çdo vendim të merret në përputhje me legjislacionin ne fuqi.
Andaj, kërkojmë mirëkuptimin e qytetarëve për të mos penguar ushtrimin e detyrave të ZRRE, konform mandatit te saj”, thuhet në reagim.
Derisa, aktivistët e grupit “Asnjë cent më shumë” janë arrestuar sot nga Policia e Kosovës, gjatë një aksioni që zhvilluan para objektit të ZRRE-së.