Tarifat e reja të energjisë elektrike do të fillojnë të zbatohen nga data 9 shkurt, kur ka hyrë në fuqi vendimi i Zyrës së Rregullatorit të Energjisë i cili parasheh shtrenjtimin e energjisë elektrike për një pjesë të familjeve kosovare.
Sipas vendimit të Rregullatorit, bizneset dhe konsumatorët shtëpiakë që shpenzojnë deri në 800 kilovatë në muaj do të paguajnë me tarifat aktuale, pra nuk do të ketë shtrenjtim të energjisë elektrike për ta.Ndërsa, konsumatorët që konsumojnë mbi 800 kilovatë do të preken nga shtrenjtimi i energjisë. Për kilovatët e shpenzuara mbi bllokun prej 800 kilovatë, pra 801 kilovatë e tutje do të paguajnë tarifën e lartë, 12.5 centë për energjinë e konsumatuar gjatë ditës dhe 5.9 centë për energjinë e konsumuar gjatë natës.
Pra, vendimi i ZRrE-së thotë që nëse një konsumator i shpenzon 1,000 kilovatë në muaj, ai për 800 kilovatë do të paguajë më tarifat e lira kurse 200 kilovatët e tjerë do t’i paguajë me tarifat e reja, më të shtrenjta.Zyra e Rregullatorit për Energji kanë thënë se vendimi për tarifa hynë në fuqi nga data 9 shkurt 2022 dhe do të jenë në fuqi deri me 31 mars 2023. Kjo zyre ka treguar se tarifat e reja së bashku me bllokë tarifën do të fillojnë të aplikohen nga data 9 shkurt.“Energjia elektrike e konsumuar para datës 9 shkurt 2022, do të kalkulohet me tarifa siç kanë qenë në fuqi para datës 9 shkurt”, thuhet në përgjigjen e ZRrE-së për KALLXO.com.
