Pasditen e sotme një zjarr ka përfshirë stallën e fermerit Ali Ajdari në fshatin Vlashnje të Prizrenit. Sipas kryetarit të Bashkësisë Lokale të Vlashnjes, Petrit Hoxhaj, nga zjarri janë shpëtuar delet dhe kafshët e tjera, ndërsa dëmet materiale, sipas vlerësimeve fillestare, mund të arrijnë deri në 50 mijë euro.
Hoxhaj ka bërë të ditur se familja Ajdari kishte ngritur vazhdimisht shqetësime pranë KEDS-it lidhur me rrezikun që i kanosej fermës. Ai ka thënë se edhe personalisht, së bashku me fermerin, kishte adresuar këtë problem pranë kësaj kompanie, por sipas tij, shqetësimet nuk kishin marrë zgjidhje.
Pas rastit, Hoxhaj ka kërkuar nga institucionet përgjegjëse që të hetojnë shkaqet e zjarrit dhe të shqyrtojnë ankesat e mëparshme të fermerit.
