Administrata e presidentit Donald Trump është angazhuar në përpjekje për marrëveshje me vende të tjera, për t’i dërguar atje emigrantët e dëbuar nga Shtetet e Bashkuara të Amerikës, sipas zyrtarëve të njohur me këtë çështje, shkruan Gazeta Sinjali.
The Wall Street Journal ka raportuar se zyrtarët e imigracionit po kërkojnë më shumë destinacione ku mund të dërgojnë emigrantë që SHBA dëshiron t’i deportojë.
E që në mesin e tyre, sipas këtij raportimi, konsiderohet të jetë edhe Kosova.
Ndër vendet që SHBA-ja ka kërkuar të marrin të deportuarit janë Libia, Ruanda, Benini, Eswatini, Moldavia, Mongolia dhe Kosova.
Tutje, SHBA-ja shpreson që këto vende të bien dakord me kërkesat e administratës, ndoshta në këmbim të marrëveshjeve financiare ose përfitimit politik për të ndihmuar Presidentin Trump të përmbushë një nga prioritetet e tij kryesore të brendshme.
Modeli i tyre i dëshiruar bazohet në një marrëveshje të njëhershme që administrata arriti me Panamanë në shkurt, sipas së cilës ata dërguan një aeroplan me mbi 100 emigrantë, kryesisht nga Lindja e Mesme, në vendin e Amerikës Qendrore. Panamaja më pas i ndaloi emigrantët dhe punoi për t’i dërguar në vendet e tyre të origjinës.