Kalaja e Prizrenit, Xhamia e Sinan Pashës, kisha ortodokse e Shën Gjergjit, Katedralja e Zonjës Ndihmëtare, Lumbardhi, kisha e Shën Premtes, objekti i Hamamit dhe Sahat Kullës, Hamamin e Gazi Mehmet Pashës, Ura e Gurit dhe Kompleksi i Marashit janë vetëm disa nga pikat kryesore ku çdo turistë mund ta eksploroj në qytetin antik të Prizrenit.
Prizreni është qytet në pjesën jug-perëndimore të Kosovës, i dyti në Kosovë për nga madhësia. Është komuna më e madhe në rajonin jugor të Kosovës, me afër 180 mijë banorë, të cilët jetojnë në qytet dhe 76 fshatra.
Qytet i hapur tregtar, metropol dhe djep i zejtarisë, kulturës e artit bëhet në shekullin XIV gjatë sundimit të Perandorisë Osmane.
Si “Qytet muze” shquhet sepse është i pasur me monumente të trashëgimisë kulturore e fetare, por njëkohësisht edhe me objekte të arkitekturës autoktone. Shumë-etniciteti është veçori tjetër, ngase në të jetojnë shqiptarët, turqit, boshnjakët, romët e serbët. Si shëtitje nëpër kohë, cilësohet sheshi në qendrën e qytetit pasi që aty dallohen objekte të shumta të trashëgimisë kulturore e fetare që shtrihen në një perimetër të ngushtë, si dëshmi për larminë dhe tolerancën e gjatë ndëretnike dhe ndërfetare.
Kalaja e Prizrenit e cila shtrihet si kurorë mbi qytetin, përmban një pjesë të rëndësishme të historisë së lashtë të qytetit dhe konsiderohet si simbol i qytetit. Nga aty, mund të shihet i tërë kompleksi muzeal i Lidhjes së Prizrenit. E Prizreni zë një vend të veçantë në historinë e Lëvizjes Kombëtare Shqiptare, pikërisht se ishte kryeqendër e Lidhjes së Prizrenit, që u themelua me 10 Qershor 1878.
Me zbritjen nga Kalaja ju kaloni pranë Xhamisë së Sinan Pashës, e cila është njëra prej objekteve më reprezentative të qytetit. Nuk është xhamia më e vjetër e Prizrenit, mirëpo është xhamia më e bukur e qytetit dhe më gjerë. Simbol identifikues i Prizrenit ndërtuar në vitin 1615, arkitektura e saj paraqet fuqi, kompaktësi, sharm dhe elegancë.
Objekte të fesë ortodokse dhe katolike ndodhen afër kësaj xhamie. Kisha ortodokse e Shën Gjergjit është pjesë e mozaikut të objekteve të trashëgimisë fetare që janë të vendosura në sheshin e Shadërvanit, derisa ecja e shkurtër nëpër Qafën e Pazarit të shpie te Katedralja e Zonjës Ndihmëtare.
Me kalimin e rrugicave të ngushta dhe Lumbardhin, hasim në Kishën e Shën Premtes si njëra nga objektet e trashëgimisë fetare e kulturore që përshkruan ecuritë historike të Prizrenit. Ky objekt është monumenti i parë i qytetit të Prizrenit që u radhit në listën e UNESKO-s në vitin 2006.
Pothuajse ngjitur me Kishën e Shën Premtës është objekti i Hamamit dhe Sahat Kullës, që sot funksionon si Muze Arkeologjik. Ky muze është i vendosur në Sahat-Kullë dhe galerinë e Hamamit, kurse i ndërtuar më 1498.
Hamamin e Gazi Mehmet Pashës është vendi me të cilin ballafaqohemi nëse ecim tutje në rrugicat e ngushta drejtuar qytetit. Hamami i Prizrenit është një monument i periudhës së hershme otomane në të cilën kombinohen traditat orientale dhe lokale.
Pas Hamamit, rruga të shpie te Ura e Gurit e cila është e vendosur në qendër të qytetit dhe e ndërtuar gjatë shekullit XVI nga gurët e gdhendur lokal, me tri harqe.
Dhe nga Kompleksi i Marashit mund të shijoni atraksionet natyrore, gjendet në pjesën lindore të Prizrenit dhe paraqet një simbiozë të këndshme të trashëgimisë natyrore dhe arkitektonike.
“Mirë se erdhët në Jugun Magjepës”
