Edhe pse plani për vaksinim masiv të qytetarëve të Kosovës parasheh imunizim deri në 500 mijë persona në muaj, në katër ditët e para që kur ka nisur ky proces, janë vaksinuar nga 7500 qytetarë në ditë.
Procesi i vaksinimit masiv nisi të martën, më 15 qershor. Në raportin e Ministrisë së Shëndetësisë të publikuar të mërkurën, u bë e ditur se për 24 orë janë kryer 7492 vaksinime. Në tri ditët pasuese janë kryer nga 8446 vaksinime, 7341 dhe 7018 në raportin e publikuar të shtunën. Mesatarisht në katër ditët e para të vaksinimit masiv, Kosova ka kryer nga 7574 vaksinime në ditë, apo 30 mijë e 297 për katër ditë.
Sipas planit të veprimit për vaksinimin e qytetarëve në masë me vaksinën kundër COVID-19, të publikuar nga Ministria e Shëndetësisë, thuhet se synohet vaksinimi i 500 mijë personave në muaj, e që i bie vaksinimi i rreth 16 mijë personave në ditë.
Me të nisur ky proces janë duke u vaksinuar grupmoshat mbi 65-vjeç, personat me sëmundje kronike pa dallim moshe, mësimdhënësit dhe forcat e sigurisë të përfshira direkt në menaxhim të pandemisë.
Sipas ministrit të Shëndetësisë, Arben Vitia, Kosova është në pritje të kontingjenteve me mbi 1 milion vaksina të blera nga kompania “Pfizer”. Po sipas tij, kontingjenti i parë do të mbërrijë në vend deri në fund të qershorit.
Aktualisht në vend po kryhen vaksinime vetëm me vaksinat e ardhura si donacion nga Bashkimi Evropian dhe aleanca “COVAX”. Janë kryer 132 mijë e 901 vaksinime. Prej tyre 17 mijë e 476 persona janë vaksinuar edhe me dozën e dytë.
Nga fillimi i pandemisë, në Kosovë janë regjistruar 107 mijë e 645 raste pozitive. 2251 persona kanë humbur jetën. Aktualisht janë 176 raste aktive.
