Universiteti “Ukshin Hoti” në Prizren dhe Spitali i Përgjithshëm “Prim. Dr. Daut Mustafa” kanë nënshkruar sot një marrëveshje të rëndësishme bashkëpunimi. Në ceremoninë e nënshkrimit, Rektori i Universitetit, Prof. Dr. Mentor Alishani, mirëpriti Drejtoreshën Ekzekutive të Spitalit, Dr. spec. Narqize Arënliu – Hoxhaj, e cila ishte e shoqëruar nga bashkëpunëtorët e saj, njofton faqja zyrtare e Universitetit.
Kjo marrëveshje shënon një hap të rëndësishëm për të dyja institucionet, duke synuar organizimin e aktiviteteve të përbashkëta në kuadër të muajit të ndërgjegjësimit për kancerin e gjirit. Krahas këtyre aktiviteteve, do të zhvillohen edhe iniciativa të tjera të përbashkëta që do të forcojnë bashkëpunimin midis institucioneve
Gjatë takimit, Rektori Alishani dhe Drejtoresha Arënliu – Hoxhaj shprehën përkushtimin e tyre për të ndërtuar ura të reja bashkëpunimi dhe për të kontribuar në përmirësimin e shërbimeve shëndetësore dhe edukative në komunitetin e Prizrenit dhe më gjerë. Të dyja palët theksuan rëndësinë e këtij partneriteti, që do të sjellë përfitime konkrete për studentët, stafin dhe gjithë komunitetin.
Ky bashkëpunim i ri është një hap i rëndësishëm drejt përforcimit të lidhjes mes arsimit dhe shëndetësisë, duke krijuar mundësi të reja për të dyja institucionet që të përmirësojnë jetën e qytetarëve të Prizrenit dhe të ofrojnë një mbështetje të madhe për kauzat që prekin të gjithë ne, thuhet në fund të këtij njoftimi.
