Universiteti “Ukshin Hoti” ka pranuar së fundmi një donacion me vlerë prej rreth 110 librash nga Albert Martin Steffe, gjuhëtar dhe ish-mësimdhënës i gjuhës gjermane dhe gjuhëve të huaja në Hamburg, Gjermani.

Ky donacion përfshin literaturë të pasur nga fusha të ndryshme si: gjuhë dhe letërsi gjermane, angleze, franceze, suedeze, histori, filozofi, psikologji, teologji, muzikë, periudha e Vikingëve, këshillim, si dhe libra dhe materiale turistike e harta udhëtimi të gjitha me vlerë të veçantë për pasurimin e bibliotekave akademike.

Dorëzimi i librave në Prizren u bë i mundur falë bashkëpunimit me MPJD, respektivisht Konsullatën e Republikës së Kosovës në Hamburg, në veçanti me angazhimin e konsullit Mizbah Mustafa, të cilit i jemi thellësisht mirënjohës për ndërmjetësimin dhe përkujdesjen gjatë transportit.

Universiteti shpreh falënderimet më të sinqerta për Steffe dhe bashkëshorten e tij për këtë akt bujarie, si dhe për besimin që ata treguan duke zgjedhur Universitetin “Ukshin Hoti”  si vendmbërritje të këtij donacioni. Ky gjest është një kontribut i drejtpërdrejtë në zhvillimin akademik të studentëve dhe stafit dhe përforcon më tej lidhjet e solidaritetit ndërkombëtar në arsim dhe kulturë.

Universiteti është i hapur dhe i gatshëm për bashkëpunime të tilla në të ardhmen, që ndihmojnë në pasurimin e burimeve të dijes për komunitetin tonë akademik.