Në vazhdën e zgjerimit të bashkëpunimeve akademike ndërkombëtare dhe rajonale, Universiteti “Ukshin Hoti” në Prizren ka nënshkruar një marrëveshje bashkëpunimi akademik me Universitetin e Tetovës.
Marrëveshja u nënshkrua nga rektori i Universitetit “Ukshin Hoti” në Prizren, Prof. Assoc. Dr. Mentor Alishani, dhe rektori i Universitetit të Tetovës, Prof. Dr. Jusuf Zejneli.
Në një njoftim zyrtar nga ky universitet thuhet se qëllimi i kësaj marrëveshjeje është forcimi i lidhjeve akademike, arsimore dhe kërkimore ndërmjet dy institucioneve, përmes shkëmbimeve të stafit akademik dhe studentëve, zhvillimit të përbashkët të projekteve kërkimore, si dhe organizimit të konferencave, seminareve dhe aktiviteteve të tjera shkencore me interes të përbashkët.
“Përmes kësaj marrëveshjeje, të dy universitetet angazhohen të krijojnë mundësi të reja për bashkëpunim ndërinstitucional, aplikim të përbashkët në fonde kërkimore dhe projekte zhvillimore, si dhe shkëmbim përvojash në fushat arsimore dhe kulturore. Marrëveshja do të jetë në fuqi për një periudhë pesëvjeçare, me mundësi rinovimi, dhe pritet të kontribuojë në rritjen e cilësisë akademike dhe ndërkombëtarizimin e të dy institucioneve të arsimit të lartë. Kjo marrëveshje përfaqëson një hap të rëndësishëm drejt forcimit të bashkëpunimit rajonal akademik dhe shkencor, duke krijuar ura të reja komunikimi e zhvillimi mes dy universiteteve”, thuhet në njoftim.